बातमीत काय वाचाल?
- महाराष्ट्रातील विविध क्षेत्रांमध्ये उल्लेखनीय कार्य करणाऱ्या १०० मान्यवरांची निवड या पुरस्कारासाठी करण्यात आली असून, त्यामध्ये शरद उमाकांत अस्वारे यांची निवड ही त्यांच्या सातत्यपूर्ण आणि निःस्वार्थ समाजसेवेची पावती मानली जात आहे.
- समाजासाठी निःस्वार्थ भावनेने कार्य करणाऱ्या व्यक्तींचा सन्मान करण्याच्या उद्देशाने दिल्या जाणाऱ्या ‘लोकवार्ता पर्सन ऑफ द इयर' पुरस्कारासाठी यंदा शरद उमाकांत अस्वारे यांची निवड करण्यात आली आहे.
- विशेष म्हणजे, त्यांच्या या समाजसेवेच्या प्रवासात त्यांना त्यांच्या पत्नी सुजाता शरद अस्वारे तसेच त्यांच्या भावांचा मोठा आधार लाभला आहे.
मुंबई | प्रतिनिधी
समाजासाठी निःस्वार्थ भावनेने कार्य करणाऱ्या व्यक्तींचा सन्मान करण्याच्या उद्देशाने दिल्या जाणाऱ्या ‘लोकवार्ता पर्सन ऑफ द इयर’ पुरस्कारासाठी यंदा शरद उमाकांत अस्वारे यांची निवड करण्यात आली आहे. साधी शैक्षणिक पार्श्वभूमी (१० वी पर्यंत शिक्षण) असूनही आणि खाजगी नोकरी करत असतानाही त्यांनी समाजसेवेच्या माध्यमातून उभा केलेला प्रभावी आदर्श विशेष लक्षवेधी ठरला आहे.
शरद उमाकांत अस्वारे हे गेल्या अनेक वर्षांपासून सातत्याने विविध सामाजिक उपक्रम राबवत आहेत. दरवर्षी १४ एप्रिल रोजी डॉ. बाबासाहेब आंबेडकर जयंती आणि ६ डिसेंबर रोजी महापरिनिर्वाण दिनानिमित्त ते अन्नदान, विद्यार्थ्यांना शैक्षणिक साहित्याचे वाटप यांसारखे उपक्रम आयोजित करतात. या माध्यमातून त्यांनी गरजू विद्यार्थ्यांना शिक्षणासाठी प्रोत्साहन देण्याचे महत्त्वपूर्ण कार्य केले आहे.
याशिवाय, मुंबईतील टाटा कॅन्सर हॉस्पिटलमध्ये उपचारासाठी आलेल्या रुग्णांच्या नातेवाईकांना ते नियमित अन्नदान करतात. अनेकदा हे नातेवाईक महिनोन्महिने हॉस्पिटलमध्येच राहतात, अशा परिस्थितीत अस्वारे यांचे हे योगदान त्यांच्या जीवनात मोठा दिलासा देणारे ठरते.
अस्वारे यांचे कार्य केवळ अन्नदानापुरते मर्यादित नसून त्यांनी आशा सदनसारख्या बालगृह आणि आधार केंद्रांमध्ये राहणाऱ्या बालकांसाठी तसेच आश्रित महिलांसाठी कपडे वाटप, अन्नदान आणि विविध वैद्यकीय शिबिरांद्वारे मदत मिळवून देण्याचे कामही केले आहे. त्यांच्या या सर्व उपक्रमांमुळे समाजातील वंचित घटकांपर्यंत थेट मदत पोहोचत आहे.
रक्तदानाच्या क्षेत्रातही त्यांनी उल्लेखनीय योगदान दिले असून अनेक सामाजिक संस्थांसाठी त्यांनी स्वतः रक्तदान करून समाजासमोर एक आदर्श निर्माण केला आहे.
विशेष म्हणजे, त्यांच्या या समाजसेवेच्या प्रवासात त्यांना त्यांच्या पत्नी सुजाता शरद अस्वारे तसेच त्यांच्या भावांचा मोठा आधार लाभला आहे. “माझी पत्नी आणि माझे भाऊ माझ्या पाठीशी ठामपणे उभे आहेत, म्हणूनच मी समाजासाठी अधिक प्रभावीपणे काम करू शकतो,” असे शरद उमाकांत अस्वारे आवर्जून सांगतात.
दरम्यान, ‘लोकवार्ता पर्सन ऑफ द इयर’ पुरस्कार वितरण सोहळा १ मे २०२६ रोजी मुंबई येथे पार पडणार आहे. महाराष्ट्रातील विविध क्षेत्रांमध्ये उल्लेखनीय कार्य करणाऱ्या १०० मान्यवरांची निवड या पुरस्कारासाठी करण्यात आली असून, त्यामध्ये शरद उमाकांत अस्वारे यांची निवड ही त्यांच्या सातत्यपूर्ण आणि निःस्वार्थ समाजसेवेची पावती मानली जात आहे.
समाजात सकारात्मक बदल घडवून आणण्यासाठी मोठ्या पदांची किंवा उच्च शिक्षणाची गरज नसते, तर प्रामाणिक इच्छाशक्ती आणि सेवाभाव हाच खरा भांडवल असतो, हे शरद उमाकांत अस्वारे यांच्या कार्यातून अधोरेखित होते.
